Publikasiegeleentheid vir debuutkortverhale

Publikasiegeleenthede in Afrikaans is uiters beperk. Veral vir debuutskrywers. Daar lê pragtige verhale in laaie rond wat nooit in druk sal verskyn nie. Dit is te bejammer.

Selfpublikasie is ʼn uitweg. Selfs bekende skrywers wend hulle deesdae tot hierdie wyse van publikasie. Dit is ongelukkig ʼn duur en moeisame proses en nie lewensvatbaar vir alle skrywers nie.

Sekwa Ditholo Uitgewers wil nou ʼn geleentheid skep om dit binne die bereik van debuutskrywers te bring. Ko-operatiewe selfpublikasie maak dit moontlik.  

Die plan werk soos volg.

1. Alle debuutskrywers word genooi om kortverhale voor te lê.
2. ʼn Voorlopige keuring word gedoen om die kaf van die koring te skei. Neem kennis dat redigering die verantwoordelikheid van die skrywer is.
3. Dit word beoog om gekeurde verhale in bundels van vyftien te groepeer.
4. Die bundels word dan aan die vyftien deelnemende skrywers gestuur om te keur en te beoordeel. ʼn Kort keuringsverslaggie word ten opsigte van elke verhaal voltooi.
5. By ontvangs word die keuringsverslae dan aan elk van die skrywers gestuur vir kennisname en aandag waar nodig.
6. Nadat die verhale, na hersiening waar nodig, vanaf die skrywers terug ontvang is word die drukkoste van honderd en vyftig kopieë, plus die aantal vir verpligte biblioteke, van die bundel bepaal. Neem kennis dat die drukkoste slegs werklike uitgawes sal wees. Daar word geen wins of vergoeding ingebou nie.
7. Die deelnemende skrywers sal dan versoek word om die koste van tien boeke plus versendingkoste te betaal. Sodra al die inbetalings gedoen is sal die boek gedruk word.
8. Tien kopieë van die boek sal dan aan die deelnemende skrywers versend word om daarmee na goeddunke te handel. Verdere kopieë kan op aanvraag beskikbaar gemaak word.

Alle voorleggings, korrespondensie of navrae moet elektronies wees. Vra asseblief ʼn ‘read receipt’. Indien u dit nie dadelik ontvang nie, volg asseblief op. Voorleggings moet voorlopig in Word formaat wees. Meer as een voorlegging per skrywer word verwelkom. Eienaarskap van die kortverhale moet dié van die skrywer wees. Dit word aanvaar dat verhale deeglik geredigeer is aangesien ons op hierdie stadium nie oor die dienste van ʼn redigeerder beskik nie. Elke voorlegging moet asseblief  elk sy eie dekblad hê met die titel en kontakbesonderhede van die skrywer.

Hierdie is ʼn loodsprojek en behou ons die reg voor om wysigings aan die proses aan te bring waar nodig om dit werkbaar te maak.

Alle kommunikasie en voorleggings na lowren@telkomsa.net