Iemand vir 'n Scoop? - Marida Fitzpatrick

Iemand vir ’n scoop? deur Marida Fitzpatrick. Uitgewer: Tafelberg. R145.

Dis soos ’n heerlike skindersessie met jou beste vriendin, maar veel meer: dis ’n reënerige Sondagmiddag in ’n kokon van onderbeklemtoonde bliss in die bed met koffie en tjoklits; dis jy in jou duvet voor jou gunsteling-sepie, dis om skelm uit die kantoor te sluip om alleen te gaan fliek.
Want dit is – presies nes chick lit veronderstel is om te wees – die hoogste vorm van gemak, troos en ontspanning. Dit skep ’n sone waarin jy heeltemal jouself kan wees. Sonder dreigemente, mededinging, vooroordele – en ook sonder pretensie dat jy eintlik intellektueel is.

Want dit is hoe ons Andi, die hoofkarakter, sien. Sy is snaaks en weerloos en het ’n effens neurotiese swak vir roomys en mooi lap. Sy is amper dertig en obsessief oor die feit dat sy steeds single is, steeds nie haar doelwit bereik het nie en nog altyd in ’n doodloopstraat sit as vermaak-verslaggewer by die sukkelende poniekoerant Pers.

Andi kyk grootoog na Media Park, waar die Naspers-kantore is, en waar sy glo haar droomwerk wag – in die glaskantore van Rapport of Sarie, as ’n ernstige joernalis, of ten minste een wat oor “mooi’’ en “inspirerende’’ dinge skryf. En al wat tussen haar en haar droomwerk lê, voel sy, is ’n scoop waarmee sy naam sal maak.

En dit kry sy toe sy ’n tip-off kry oor die skadukant van Jack Greeff, sanger en klubmagnaat. Ons volg haar effens lomp en nie-heeltemal-007-nie-vordering met die groot exposé – en dis histeries. Want terselfdetyd begin Luan Verster, Hugh Grant-look-alike en Adonis, per e-pos met haar flankeer.

Intussen gaan haar gewone lewe ook maar aan, soos die aanhoudende gekarring van haar ma dat sy met ’n doktor moet uitgaan om te vergoed vir die feit dat sy nie een geword het nie en haar knaend herinner om water en kalsiumpille te drink. Terwyl die redakteur, Paul Meintjies (met sy “falliese’’ snor), heeltyd aan haar hakskene hap om die nuutse skindernuus te kry oor 7de Laan-sterre en Steve Hofmeyr se outobiografie.

Fitzpatrick skryf wonderlik satiries oor die celeb-skandes en freak of the week-soort joernalistiek wat ons almal daagliks moet verteer. Duidelik ken sy as joernalis al die skandes en skete van dié geromantiseerde bedryf.

Die storie is net reg vir enige moderne vrou wat 24/7 uitgedaag word om balans te vind tussen loopbaan en persoonlike lewe, en boonop voel sy’s nooit heeltemal goed genoeg nie. Dis eerlik en plat op die aarde, en niks word in watte gewikkel nie.

Dis so lekker om ’n slag iets te lees oor die alledaagse snaaksighede en persoonlike probleme wat in bekende plekke afspeel – en dan nog boonop in ’n bekende taal: die karakters drink koffie in Sandton, koop by Woolies of maak ’n draai by Weigh-Less in Cresta. Andi sit tussen smouse in die verkeer en droom daarvan om artikels oor Zuma te skryf.

En dis seker dan die doel van chick lit, om te klink soos jóú laatnaggesprek oor ’n Häagen-Dazs. Hiermee nooi ek jou om dit een Sondagmiddag gulsig op te slurp.

Koop Iemand vir 'n scoop? HIER van Kalahari.