Kites het met die wonderlike idee vorendag gekom dat ons hier by Boekemakranka ons eie lys van Top 100 Afrikaanse boeke opstel. Soveel keer in die verlede het ek al raakgelees dat mense vra na so lys, maar sover ek weet is daar nie so iets beskikbaar nie.
Dis 'n idee wat my baie opgewonde gemaak het, en nadat ek Kites se lysie van sy gunsteling Afrikaanse boeke onder oë gehad het, het ek besef wattter taak dit gaan wees. Sy lysie bevat 286 titels, en meeste daarvan is klassieke en ouer werke.
Lede van hierdie forum is almal boekliefhebbers, en by uitstek geskik om so 'n lys saam te stel. Om boeke op te stem en af te stem.
Ek gaan Kites se lysie as vertrekpunt gebruik, en net 'n paar van die titels vat en hier opsit, en dan kan elke persoon sy lysie van gunstelinge hier bysit. Ek sal Die Lys agter die skerms verwerk en byhou, en dit dan gereeld (miskien weekliks) met die meningspeiling fasiliteit hier opsit. Op hierdie manier gaan ons by 'n fantastiese lys uitkom, wat dan jaarliks hersien kan word.
Wie stem vir hierdie een?
