Jy bly my kind, ‘n debuutbundel wat in 2005 gepubliseer is, is my bydrae tot die rakke van die boekwinkels. Dit handel oor my en tot ‘n sekere mate ook my man se, aanvaarding van ons gay dogter. Die bedoeling was om ondersteunend te wees vir ander ouers en ook kinders, soos ons. Ek het baie briewe van gay mense en hulle ouers ontvang na die skryf van die boek.
Ek beywer my self vir die bou van brûe tussen die twee wêrelde van hetero en homoseksueel deur op verskillende plekke en geleenthede motiveringspraatjies hieroor te lewer. Omdat ek van mening is dat rolmodelle net so geweldig belangrik vir gay mense is as vir ander, het ek ‘n artikel oor rolmodelle geskryf. Dit handel oor Dr Jean du Plessis (Sielkundige) en sy lewensmaat van 27 jaar, Danie Smit. Die artikel gaan in die volgende uitgawe van Gay Pages verskyn. Daar gaan ook in die September uitgawe van die tydskrif Wrapped ‘n artikel wat ek geskryf het, verskyn. Ek het baie stories wat gay mense met my gedeel het, om te vertel. Ek is besig met nog ‘n artikel oor ‘n gay man wat 12 jaar gelede ‘n vyf jarige seuntjie, as enkelouer, aangeneem het. Dis ‘n wonderlike verhaal van ‘n baie dapper man wat ‘n stukkende seuntjie help heel word het. Dit wil ek graag in ‘n hoofstroom tydskrif gepubliseer kry. Die bedoeling is om vir mense te wys dat gay mense nie noodwendig promisku is nie.
