Taalmaand in Augustus gevier

Afrikaans, isiXhosa, Engels en Sesotho … ’n bymekaarkoms van dié tale vind op Saterdag 23 Augustus in Mbekweni net buite die Paarl plaas as deel van die Afrikaanse Taalmuseum en -monument se Taalmaandvieringe. ’n Multikulturele, veeltalige program met gedigvoorlesings, sang, dans en tradisionele kos wag op besoekers aan Chippa’s Place, ’n plaaslike restaurant, wat met die Taalmuseum en Paarl Toerisme saamspan vir dié fees met die naam “Met eish, ja”. ’n Feesbus sal besoekers vanaf die Taalmuseum na Chippa’s Place vervoer.

Die Taalmuseum, wat sedert 1999 ’n jaarlikse Taalweek vier, werk vanjaar met verskeie organisasies saam om ’n maandlange program van musiek, voorlesings, praatjies, opvoedkundige programme en geleenthede vir vroue in die Paarl en omgewing aan te bied. Dié spesiale Taalmaandprogram is ook ter ondersteuning van die Verenigde Nasies se verklaring van 2008 tot die Internasionale Jaar van Tale.

Kliek hier vir die volledige program.