Daar is drama in die land: die tafel is gedek vir die nuwe Nagtegaal-teksprys. Dramaturge moet hul vere regskud, want die sluitingsdatum is 31 Augustus 2008. Die wenstuk tref die planke reeds einde Janaurie 2009 op die Suidoosterfees in die Kunstekaap. Daar is ‘n slypskoolnaweek by Clara Anna-fontein buite Durbanville oor die naweek van 17 tot 19 Oktober.
Intussen het daar baie werk agter die skerms plaasgevind om blootstelling aan die wenteks te verbeter. Een van die doelstellings van Dirk Nagtegaal was om van die teksprys ‘n nasionale feesproduksie te maak deurdat dit regdeur die jaar speelvak geniet. Hierdie mylpaal is nou bereik danksy die ondersteuning van al die groter feeste.
Die teksprys se eertydse bondgenoot, Absa KKNK, is weer aan boord. Brett Pyper het ingestem om die wenstuk speeltyd tydens die 2009-fees te gee. Die sluitingsdatum vir KKNK-inskrywings is dieselfde as die Nagtegaal-teksprys s’n. So kom alle inskrywings van nuwe werk vir die KKNK outomaties in aanmerking vir die Nagtegaal-teksprys.
Die ander feeste was ewe entoesïasties. Die wenstuk in die Nagtegaal-teksprys sal in 2009 op die volgende feeste speel: Die Suidoosterfees in Kaapstad, Die Woordfees in Stellenbosch, Absa KKNK in Oudtshoorn, Innibosfees in Nelspruit (hulle moet nog finaal instem), Die Volksbladfees in Bloemfontein en Aardklop in Potchefstroom. Dit gaan ook op kleiner feeste en in ander dorpe opgevoer word.
So, daar is heelwat op die spel. Laai jou inskrywing af by www.genugtig.com, skakel vir Bev Maritz by 021 5212000 of 083 504 3665 of e-pos bev@genugtig.com. Breek ‘n been!
