PROEFLERS

Ai, maankind, jammer ek kan mos tog altyd so voor op die wa wees! Ek sal maar weer my skoene van nederheid aan my voete glip! Maar wat is 'n ou voorstelletjie dan tog as mens hom nie kan voorlê nie!

Kadys,
Ek wil nou nie snaaks wees nie (en dis nie persoonlik bedoel nie), maar as 'n uitgewer jou bydrae hier moet lees, gaan hy/sy nie dink dat jy 'beskikbar' is as 'profleser' nie.

O, gits, oops! Jy is reg, woordsmid. Net om jou te wys, ek is beskikbaar as proefleser!

Marinda, miskien is proefleser nie die regte benaming vir dit wat ek in gedagte het nie, dalk het dit meer met kontinuiteit te doen. Ek sien myself glad nie as 'n taalkundige nie, daarvoor is ek heeltemal té lief vir kommas op verkeerde plekke. Die beste voorbeeld van dinge wat ek as ongeloofwaardig en onwaarskynlik beleef het, was soos dit in EKM Dido se 'n Ander ek voorgekom het. Dit was nie vir my baie waarskynlik dat 'n persoon wat uit 'n goeie agtergrond gekom het (soos die karakter in die boek) en met 'n goeie akademiese opleiding so heeltemal kon verdwyn. Ek was heeltyd oortuig daarvan dat daar met die ontknoping van die verhaal 'n verduideliking daarvoor sou wees, maar daar was nie. Terselfdertyd was mens beindruk met die skrywer se kennis op haar vakgebied as verpleegkundige (tog het dit die wanbalans in die boek verhoog). Nadat ek haar boek 'n Stringetjie blou krale gelees het, was ek baie opgewonde om hierdie nuwe boek van haar te lees. Ek het namens haar 'n verleentheid ervaar. Nog 'n voorbeeld, net op 'n ander vlak, was Chanette Paul se Springgety. Ek dink een en elkeen van ons op hierdie forum weet dat Chanette iemand met baie goeie kwalifikasies is. Ek het begrip daarvoor dat sy vir 'n spesifieke teikenmark skryf met haar liefdesverhale en hierdie, haar eerste spanningsroman. Daar was van meet af aan woorde wat selfs ek in die woordeboek moes gaan naslaan. Ek is van mening dat die taalgebruik hier en daar bo die vuurmaakplek van baie van haar lesers is. Haar boeke oor die Davelvroue het weer beindruk met die goeie navorsing wat sy gedoen het, maar daar was nie sulke lastighede nie. Ek weerhou myself gewoonlik van kritiek soos hierdie, want wie is ek nou eintlik? Maar ek is 'n leser en daar is goed wat vir my steurend is in sekere boeke. Ek sou ook nie hierdie kritiek maklik in die openbaar uitspreek nie, maar jy het vir voorbeelde gevra. Op watter stadium hierdie taak waarvan ek praat, gedoen moet word, weet ek nie, maar ek dink dat ek dit sal kan doen.